ناقتـي ياناقتـي لا ربــاع ولا سـديـس
وصليني لابتـي مـن ورا هـاك الطعـوس
حائلٍ رابع سنة من خيـار العيـس عيـس
خفهـا لادرهمـت كنـه بالنـار محسـوس
في دجى خالي خـلا لاحسيـس ولانسيـس
تتوخذ من شدة البـرد طقطقـة الضـروس
في عيوني يكفخ الطيـر ويطيـح الفريـس
وانتهض جساس من دون خالتـه البسـوس
وفي خفوقي فرخ جنيـةٍ يضـرس ضريـس
يوم أوردهـا هجـوس وأصدرهـا هجـوس
ديرتي دار ابن ضاري وابن غثلـم جريـس
ديرة اللي دوجوا فـي فيافـي نجـد جـوس
ديرتـي يابنـت شيـخٍ ومعدنهـا نفـيـس
عيطمـوسٍ دونهـا دثرتنـي عيطـمـوس
جادلٍ مطرق جسدهـا مـع الغربـي يميـس
طينةٍ مـن تربـة الخلـد والـدم محمـوس
نقشت خمسٍ من الخمس في يوم الخميـس
ليت شعـري مـا أرادت بهـذا دختنـوس
كـم تمنـى إن معـه مثلهـا فتنـة إبليـس
كان يمكن قد قلـب نصـف إمتنـا مجـوس
كن دماث الصدر منهـا كنيسـة أو كنيـس
صومعـة رهبـان ديـرٍ يـؤدون الطقـوس
آتقـوس مـع تقـوس نواهدهـا وأقيـس
قبتين قـاب قوسيـن قـوسٍ جنـب قـوس
خصرها يحكي لنـا واقـع القـوم التعيـس
وردفها عن غطرسة بـوش يعطينـا دروس
وبالرغم مـن قصرهـا مايجالسهـا جليـس
تصبح أطول نسوة الأرض في وضع الجلوس
العروسة ماتبي غير أبـو تركـي عريـس
العروسة نجـد ماهيـب حـي الله عـروس
نجد بنت المجـد ونسـة مونسـة الونيـس
ماعسفها إلا معزي ضحى اليـوم العبـوس
كل أهل نجد هلي من إجاء حتـى الخميـس
في ذراهم بالتجي عـن مجففـة الرسـوس
وعيشتي مابين أسودٍ ولـو مانـي رئيـس
خير من كوني رئيسٍ علـى شلقـة تيـوس
وليس عيباً إن خدعني بمكـره كـل هيـس
لأن مايفهـم بمكـر الهيـوس إلا الهيـوس
مصطفى فـي مأدبـة عمـه البابـا لويـس
كبر اللقمة تحت ضـوء حمـراء الكـؤوس
وطسم حدتها على حائـط المبكـى جديـس
يوم شقـت ثوبهـا بنـت عفـار شمـوس
سيدة هـاك القصـر إسمهـا الأول لميـس
دونها سمر الحناجـر بترهـا حـد مـوس
قسقست لاحرارهـم. قيس.قيس.قيس.قيـس
وألبستهم مـن مهانتهـم أنـواع اللبـوس
بين خدعة كعـب أخيـلٍ ومولـد أدونيـس
درسونـا الآلهـة والمـدرس هـنـا روس
ويش لاقوا من قناة السويس أهل السويـس
وويش لاقوا من تلمسان قومٍ مـن سنـوس
كلهم من شـدة الجـوع راحـوا خندريـس
بين غيبوبة مخدر وصحوة عـرق سـوس
ثورة راحـوا سببهـا بتـوع الأوتوبيـس
وش نبي فيها وهـي ماتهـز إلا الغـروس
آفة المرء اثنتان: إلف كاس وحـب كيـس
والنفوس اليا بغيـت اتعرفهـا ارم الفلـوس
ينكشف زيف الشعارات الى حمي الوطيـس
ترجع الأذناب أذناب وتبقـى الـروس روس
صدق لاقال العرب مايحـوص الا الخسيـس
ولايوط الروس شيئٍ مثل ضعـف النفـوس
ناقتـي ياناقتـي لا ربــاع ولا سـديـس
وصليني لابتي مـن وراء هـاك الطعـوس